முட்டை… சாதாரண உணவுப் பொருள் போல தோன்றினாலும், உண்மையில் அது ஒரு ஊட்டச்சத்துக்களின் பொக்கிஷம். நம் வீட்டு சமையலறை முதல் பெரிய உணவகங்கள் வரை முட்டைக்கு ஒரு நிரந்தர இடம் உண்டு. குழந்தைகள் முதல் பெரியவர்கள் வரை அனைவரும் விரும்பி உண்ணும், சமைப்பதற்கு எளிமையான, அதே சமயம் உடலுக்கு தேவையான சத்துக்களை அள்ளித் தரும் ஒரு அற்புத உணவு இது.
முட்டையில் புரதச்சத்து மட்டுமல்ல, உடலுக்கு தேவையான பலவிதமான வைட்டமின்கள் மற்றும் தாது உப்புக்கள் நிறைந்துள்ளன. போலேட், பயோட்டின், கால்சியம், பாஸ்பரஸ், செலினியம், மெக்னீசியம், துத்தநாகம், பொட்டாசியம் போன்ற சத்துக்கள் மட்டுமின்றி வைட்டமின் ஏ, டி, ஈ, கே போன்ற உயிர்ச்சத்துக்களும் இதில் அதிகம். இவ்வளவு சத்துக்கள் நிறைந்திருப்பதால்தான், மருத்துவர்கள் தினசரி உணவில் ஒரு முட்டையாவது சேர்த்துக்கொள்ள பரிந்துரைக்கிறார்கள். மேலும், முட்டை நமது உடலின் நோய் எதிர்ப்பு சக்தியை அதிகரிக்கவும் உதவுகிறது.
முட்டையில் வெள்ளைக்கரு மற்றும் மஞ்சள் கரு என இரண்டு பகுதிகள் உள்ளன. இதில் வெள்ளைக்கருவில் தான் அதிக சத்துக்கள் இருப்பதாக நிபுணர்கள் கூறுகின்றனர். வெள்ளைக்கருவில் கொழுப்புச்சத்து அறவே இல்லை என்பது குறிப்பிடத்தக்கது. உடல் எடை குறைக்க விரும்புபவர்கள் மற்றும் கொலஸ்ட்ரால் பிரச்சனை உள்ளவர்கள், டயட் இருப்பவர்கள் போன்றோருக்கு முட்டையின் வெள்ளைக்கரு ஒரு வரப்பிரசாதம். அவர்கள் தயக்கமில்லாமல் வெள்ளைக்கருவை உணவில் சேர்த்துக்கொள்ளலாம்.
மஞ்சள் கருவை பொறுத்தவரை, அதில் கலோரி மற்றும் புரதச்சத்து வெள்ளைக்கருவை விட சற்று அதிகமாக இருந்தாலும், கொழுப்புச்சத்தும் கணிசமாக உள்ளது. இருப்பினும், மஞ்சள் கருவில் உடலுக்கு தேவையான ஆரோக்கியமான கொழுப்புகள் உள்ளன. ஆனால் சில உடல் உபாதைகள் உள்ளவர்கள் முட்டையின் மஞ்சள் கருவை தவிர்ப்பது நல்லது.
யார் தான் இந்த மஞ்சள் கருவை தவிர்க்க வேண்டும்? கொலஸ்ட்ரால் பிரச்சனை உள்ளவர்கள் கண்டிப்பாக மஞ்சள் கருவை தவிர்க்க வேண்டும். ஏனெனில், முட்டையின் மஞ்சள் கருவில் உள்ள அதிகப்படியான கொழுப்பு, அவர்களின் உடல் நலத்திற்கு தீங்கு விளைவிக்கும். அதேபோல், இதய நோயாளிகள், உடல் பருமன் பிரச்சனை உள்ளவர்கள், கல்லீரல் பாதிப்பு உள்ளவர்கள் மற்றும் முகப்பரு தீவிரமாக உள்ளவர்களும் மஞ்சள் கருவை தவிர்ப்பது நல்லது.
முட்டை ஒரு சூப்பர் உணவு என்பதில் சந்தேகமில்லை. ஆனால், எல்லோருக்கும் எல்லாமும் பொருந்தாது என்பதைப் போல, முட்டையின் மஞ்சள் கரு சிலருக்கு நல்லதல்ல. எனவே, உங்கள் உடல்நிலைக்கு ஏற்ப முட்டையை உணவில் சேர்த்துக்கொள்வது நல்லது. சரியான முறையில், சரியான அளவு முட்டையை உணவில் சேர்த்துக்கொண்டால், அது ஆரோக்கியத்திற்கு மிகவும் நல்லது.
