தென்னிந்திய உணவின் பிரதான அங்கமாக திகழும் சாம்பார், அனைவரும் விரும்பி உட்கொள்ளும் ஒரு பிரபலமான குழம்பாகும். இட்லி, தோசை என எந்த உணவுடன் சேர்த்து சாப்பிட்டாலும் சாம்பார் அதன் சுவையை பன்மடங்காக்கும். ஆனால், இந்த சுவையான உணவு எப்படி உருவானது? அதன் பின்னணி என்ன? என்பது உங்களுக்குத் தெரியுமா?.
மராட்டிய தொடர்பு:
சாம்பாரின் எப்போது உருவானது என்பது குறித்த பல்வேறு கருத்துக்கள் நிலவினாலும், பெரும்பாலான வரலாற்று ஆதாரங்கள், சாம்பார் தஞ்சாவூர் மராட்டிய அரசின் காலத்தில் தோன்றியதாகக் கூறுகின்றன. தஞ்சை மராட்டிய மன்னரான சாஹூஜி, மராட்டியர்களின் பாரம்பரிய உணவான ‘ஆம்தி’யை மிகவும் விரும்பி உண்டு வந்தார். ஆனால், தஞ்சையில் கோகம்புளி கிடைக்காததால், அவர் விரும்பும் சுவையை சரியாக பெற முடியவில்லை. இந்த சூழலில், சாஹூஜியின் சமையல்காரர் புளியைப் பயன்படுத்தி புதிய ஒரு குழம்பைத் தயாரித்தார். இந்த புதிய குழம்பு சாஹூஜிக்கு மிகவும் பிடித்திருந்தது. பின்னர், இந்த குழம்பு ‘சாம்பாஜி ஆகர்’ என்று அழைக்கப்பட்டு, நாளடைவில் ‘சாம்பார்’ என்றானது.
சாம்பார் தென்னிந்தியாவின் சொந்தமாக மாறிய கதை:
தஞ்சை மராட்டிய அரசின் காலத்தில் தோன்றிய சாம்பார், பின்னர் தென்னிந்தியாவின் பல்வேறு பகுதிகளுக்கும் பரவியது. ஒவ்வொரு பகுதியிலும் உள்ள உள்ளூர் பொருட்கள் மற்றும் சுவைகளைக்கொண்டு சாம்பார் தயாரிக்கும் முறைகள் மாறுபட்டன. தமிழ்நாட்டில் முருங்கைக்காய், துவரம்பருப்பு, புளி ஆகியவை முக்கிய பொருட்களாக பயன்படுத்தப்படுகின்றன. கேரளாவில் கொத்தமல்லி மற்றும் கறிவேப்பிலை அதிகமாகப் பயன்படுத்தப்படுகின்றன. ஆந்திராவில் மிளகாய் அதிகமாக சேர்த்து சாம்பார் தயாரிக்கப்படுகிறது. இவ்வாறு, சாம்பார் தென்னிந்தியாவின் பல்வேறு பகுதிகளின் கலாச்சாரத்தையும் சுவைகளையும் பிரதிபலிக்கும் ஒரு உணவாக மாறியது.
உலகளாவிய பிரபலம்:
தென்னிந்தியாவைத் தாண்டி, சாம்பார் உலகளவில் பிரபலமான உணவாக மாறியுள்ளது. பல வெளிநாட்டு உணவகங்களில் சாம்பார் கிடைக்கிறது. சாம்பாரின் தனித்துவமான சுவை மற்றும் ஆரோக்கியமான கூறுகள் இதற்கு முக்கிய காரணங்கள். சாம்பாரில் உள்ள பருப்பு, காய்கறிகள் மற்றும் மசாலா பொருட்கள் உடலுக்குத் தேவையான புரதம், நார்ச்சத்து மற்றும் வைட்டமின்களை வழங்குகின்றன.
சாம்பார் என்பது வெறும் உணவு மட்டுமல்ல, அது ஒரு வரலாறு, ஒரு கலாச்சாரம். இனி நீங்கள் ஒவ்வொரு முறை சாம்பார் சாப்பிடும் போதும் அதன் பின்னால் உள்ள உள்ள வரலாறு மற்றும் கலாச்சாரத்தை நினைவுபடுத்திக் கொண்டு மகிழ்ச்சியாக சாப்பிடுங்கள்.
