சிறுநீர் கழிக்கும்போது எரிச்சல் ஏற்படக் காரணங்கள்!

சிறுநீர் கழிக்கும் போது ஏற்படும் வலியை (dysuria) டைசுரியா என அழைக்கப்படுகிறது. இது ஒரு சாதாரண பிரச்சனை என்றாலும், அதை அலட்சியமாகக் கருதக்கூடாது. ஏனெனில் இது பல காரணங்களால் ஏற்படலாம், மேலும் சில சமயங்களில் தீவிரமான உடல்நலப் பிரச்சினையின் அறிகுறியாகவும் இருக்கலாம்.

சிறுநீர் கழிக்கும் போது ஏற்படும் வலியின் பொதுவான காரணங்கள்:

• பாக்டீரியா தொற்று காரணமாக சிறுநீர்ப்பை, சிறுநீர்க்குழாய் போன்ற உறுப்புகளில் வீக்கம் ஏற்பட்டு, சிறுநீர் கழிக்கும் போது எரிச்சல், வலி ஏற்படும்.
• சில சமயங்களில் சோப்புகள், சுகாதாரப் பொருட்கள் போன்றவற்றால் ஏற்படும் எரிச்சலும் சிறுநீர்ப்பை நோய்த்தொற்றுக்கு வழிவகுத்து, சிறுநீர் கழிக்கும் போது வலி ஏற்படலாம்.
• சிறுநீரில் தாதுக்கள் படிந்து கற்கள் உருவாகும் போது, அவை சிறுநீர்க்குழாய் வழியாக செல்லும் போது கடுமையான வலியை ஏற்படுத்தும்.
• கோனோரியா, கிளமிடியா போன்ற STI-கள் சிறுநீர்க்குழாயில் வீக்கத்தை ஏற்படுத்தி, சிறுநீர் கழிக்கும் போது வலியை ஏற்படுத்தும்.
• தொற்று அல்லது எரிச்சல் காரணமாக சிறுநீர்க்குழாய் அழற்சி ஏற்பட்டால், சிறுநீர் கழிக்கும் போது எரிச்சல், வலி ஏற்படும்.
• ஆண்களில் புரோஸ்டேட் சுரப்பியில் வீக்கம் ஏற்படுதல்.
• பெண்களில் ஈஸ்ட் தொற்று, பாக்டீரியா வஜினோசிஸ் போன்ற தொற்றுகள்.
• போதுமான அளவு தண்ணீர் குடிக்காததால் சிறுநீர் செறிவாகி, சிறுநீர்ப்பையை எரிச்சலடையச் செய்து வலியை ஏற்படுத்தும்.
• உடலுறவின் போது ஏற்படும் உராய்வு காரணமாக சிறுநீர் கழிக்கும் போது தற்காலிகமாக வலி ஏற்படலாம்.
• சிறுநீர்ப்பை புற்றுநோய் அரிதானது என்றாலும், சிறுநீர் கழிக்கும் போது வலி, சிறுநீரில் இரத்தம் கலந்து வருவது போன்ற அறிகுறிகள் தோன்றலாம்.

சிறுநீர் கழிக்கும்போது வலி ஏற்பட்டால் என்ன செய்ய வேண்டும்?

சிறுநீர் கழிக்கும் போது வலி நீண்ட நாட்கள் தொடர்ந்தால், உடனடியாக மருத்துவரை அணுகுவது அவசியம். தொற்று காரணமாக வலி ஏற்பட்டால், மருத்துவர் ஆன்டிபயாடிக்குகள் அல்லது பிற மருந்துகளை பரிந்துரைப்பார். சிறுநீரகக் கற்கள் இருந்தால், அவற்றை நீக்க சிறப்பு சிகிச்சைகள் தேவைப்படலாம். ஒவ்வொரு நோய்க்கும் ஏற்ப வெவ்வேறு சிகிச்சைகள் பரிந்துரைக்கப்படும்.

தடுப்பு நடவடிக்கைகள்:

நாள் முழுவதும் போதுமான அளவு தண்ணீர் குடிப்பதால் சிறுநீர் செறிவு குறைந்து, சிறுநீர்ப்பை எரிச்சல் ஏற்படுவதைத் தடுக்கலாம். பிறப்புறுப்பு பகுதியை சுத்தமாக வைத்திருப்பது தொற்று ஏற்படுவதைத் தடுக்க உதவும். இறுக்கமான உள்ளாடைகளை அணிவதை தவிர்க்கவும். இறுக்கமான உள்ளாடைகள் சிறுநீர்ப்பையை அழுத்தி, வலி ஏற்படலாம். பாலியல் உறவின் போது பாதுகாப்பு முறைகளை கடைபிடித்தால் STIகள் ஏற்படுவதைத் தடுக்கலாம்.

சிறுநீர் கழிக்கும் போது ஏற்படும் வலியை அலட்சியமாகக் கருதாமல், உடனடியாக மருத்துவரை அணுகி சிகிச்சை பெறுவது முக்கியம். காரணத்தை கண்டறிந்து சிகிச்சை பெற்றால், இந்தப் பிரச்சனையிலிருந்து எளிதாக விடுபடலாம்.