என்னது! தண்ணீர் குடித்தே உடல் எடையைக் குறைக்கலாமா?

நாம் அனைவரும் ஆரோக்கியமான வாழ்க்கை வாழவே ஆசைப்படுகிறோம். அதில் மிகவும் முக்கியமான ஒன்று உடல் எடையைக் கட்டுப்படுத்துவது. பலர் உடல் எடையைக் குறைக்க பல்வேறு வழிகளைப் பின்பற்றுகின்றனர். அவற்றில் ஒன்றுதான் தண்ணீர் குடிப்பது. தண்ணீர் குடிப்பது உடலுக்கு மிகவும் அவசியம் என்பது நாம் அறிந்ததே. ஆனால், உடல் எடையை வேகமாகக் குறைக்க எவ்வளவு தண்ணீர் குடிக்க வேண்டும் என்பது பற்றி பலருக்குத் தெரிவதில்லை. 

தண்ணீர் நம் உடலில் பல முக்கியமான செயல்களை செய்கிறது. இது நம் உடலை குளிர்விக்கிறது, நச்சுப் பொருட்களை வெளியேற்றுகிறது, உணவு செரிமானம் செய்ய உதவுகிறது மற்றும் நம் உடலில் உள்ள செல்களுக்கு ஊட்டச்சத்துக்களை கொண்டு செல்கிறது. இது தவிர, தண்ணீர் நம் உடல் எடையைக் குறைக்கவும் உதவும். 

தினசரி போதுமான அளவு தண்ணீர் குடிப்பது நம் உடலின் மெட்டபாலிசத்தை அதிகரிக்கிறது. அதாவது, நாம் குடிக்கும் தண்ணீர் நம் உடலில் உள்ள கொழுப்புகளை எரிப்பதை அதிகரிக்கிறது. 

நாம் போதுமான அளவு தண்ணீர் குடிக்கவில்லை என்றால், அதிகமாக பசி எடுக்கும். அதன் காரணமாக நாம் அதிகமாக சாப்பிடும் வாய்ப்புள்ளது. எனவே, தாகம் எடுக்கும் போது முதலில் ஒரு கிளாஸ் தண்ணீர் குடிக்க வேண்டும். இது நம்முடைய பசி உணர்வைக் குறைத்து அதிகமாக சாப்பிடுவதைத் தடுக்கிறது. 

தண்ணீர் நம் உடலில் உள்ள நச்சுப் பொருட்களை வெளியேற்றுகிறது. இதனால், நம் உடலின் செயல்பாடு மேம்பட்டு உடல் எடையைக் குறைக்க உதவியாக இருக்கும். மேலும், தண்ணீர் தசை வளர்ச்சியை ஊக்குவிக்கும். தசை வளர்ச்சி உடல் எடையைக் குறைக்க உதவும். 

ஒரு நாளைக்கு எவ்வளவு தண்ணீர் குடிக்க வேண்டும்? 

ஒரு நாளைக்கு எவ்வளவு தண்ணீர் குடிக்க வேண்டும் என்பதை பல காரணிகளைப் பொறுத்து மாறுபடும். உங்கள் உடல் எடை, உடல் செயல்பாடு, காலநிலை, உடல்நிலை போன்றவை இதில் முக்கிய பங்கு வகிக்கின்றன. பொதுவாக ஒரு நாளைக்கு 8 கிளாஸ் தண்ணீர் குடிக்க வேண்டும் என்று கூறப்படுகிறது. ஆனால் இது ஒரு பொதுவான வழிகாட்டுதல் மட்டுமே. சிலருக்கு இதைவிட அதிகமாகவோ அல்லது குறைவாகவோ தண்ணீர் தேவைப்படலாம்.‌ 

தண்ணீர் குடிப்பது உடல் எடையைக் குறைக்க உதவும் என்றாலும், இது மட்டுமே போதுமானது அல்ல. உடல் எடையைக் குறைக்க நீங்கள் சரியான உணவு முறையைப் பின்பற்ற வேண்டும். இத்துடன் தொடர்ச்சியான உடற்பயிற்சி அவசியம். உங்கள் உணவில் அதிகப்படியான காய்கறிகள், பழங்கள், புரதங்கள் இருக்க வேண்டும். இனிப்பு பானங்கள் செயற்கை உணவுகள் மற்றும் அதிக கொழுப்புள்ள உணவுகளைத் தவிர்க்க வேண்டும்.